Democrats-in President Trump paihthlak tum leh

US House of Representatives speaker Nancy Pelosi chuan Pathianni khan US president kalchhuak tur Donald Trump chu a vawi hnihna atan Democrats lamin paihthlak an tum leh dawn tih a sawi.

Pelosi hian Democrats lam aṭangin lehkha a dawng a, hetah hian President ṭanglai paihthlakna tur kalpui a nih theihna atan an ram Constitution 25th Amendment chu hmang tura vice president Mike Pence ngenna resolution siam a nih thu leh, he resolution hi Vice President hnenah thehluh an tum thu an tarlang a ni. Mike Pence chu resolution chhanna hi darkar 24 chhunga tifel turin an hriattir nghal bawk a ni. 

US Constitution 25th Amendment hi hman a nih chuan House chhungah Trump paihthlakna turah vote lak a nih tur thu Democrats lam chuan an lehkhaah an tarlang. Democrats lamin President Trump paihthlak an tumna an tharthawh leh chhan hi January 6 tlaia Trump thlawp­tuten US Capital building-a Congress session neih laia luhkhung a, buaina an chawh chhuah vang a ni. He buaina thleng vang hian mi panga an thi a, mi dang eng emaw zatin hliam an tuar bawk.  

Congress session-ah hian nikum Novem­ber 3-a President thlanna neih takah Democrats candidate, Joe Biden chu electoral vote hmangin thlan tlin a ni tih tihchianna tur hun an hmang a ni. Trump hian a twitter-a buaina chawk chhuaktute chu an thiltih titawp a, in lama haw tura a hrilh hmain a thlawpna lam hawi thu a sawi hmasa a, Capitol building luhkhungtute chu ram hmangaihtu tiin a tarlang a ni. 

US Capitol Building-a buaina a chhuah hnu hian President Donald Trump-a cabinet member-te chuan President a nihna aṭanga Trump paihthlak a nih dan tur an ngaihtuah zui ve nghal a, Democrats lam chuan Pathianni khan speaker Pelosi hnenah lehkha an pe zui ta a ni. 

US Constitution 25th Amendment hmang hian vice president leh cabinet member-te chuan President chu a office luah zui zel tlaka an ngai lo a nih chuan an paihthla thei a ni. Mahse Donald Trump hi paihthlak a nih dawn chuan vice president Mike Pence-a'n a remtihpui a ngai. 

Vice President hian hei hi a pawmpui a nih chuan, President Trump hi a term zawhna tura ni reilote chauh a la awm tihah paihthlak a ni thei dawn a, a term la hman zawh lohah Vice President chu acting president angin a awm zui ang. Hetih lai hian Mike Pence hian President paihthlak tumna hi a thlawp lo nia sawi a ni thung. January 20 hian US President thar atan Joe Biden lakluh a ni tawh dawn a ni. 

Mike Pence hian 25th Amendment hi a kalpui duh lo a nih chuan, Nancy Pelosi chuan House inkhawm koin, President Trump paihthlakna tur impeachment vawi ṭum hnihna chu buaipui turin a hrilh dawn tih a sawi. Kum 2019 khan Democrats lam chuan US President kalchhuak tur Trump chu paihthlak an lo tum tawh a, khami ṭuma paihthlak an tum chhan chu a thuneihna dik lo taka hmangah leh Congress daltuah puh a nih vang a ni. Mahse hei hi Congress-ah a tlang ta lo a ni.