Palestinian-ah kum 15 hnuah inthlan tum

Palestinian Central Elections Commission (PCEC) chuan kum 15 hnua an rama inthlanpui hmasa ber tur neih leh tum a nih vangin Pathianni khan technical meeting an nei.

Meeting hi online hmanga neih a ni a, meeting hi PCEC chairman Hana Nasser chuan a kaihruai a ni. Nasser chuan meeting-ah hian legislative leh presidential election an neih tur chungchanga hmalak dan tur leh kalpui dan tur an sawi thu a tarlang.

Kar liam ta Inrinni khan Palestinian president Mahmoud Abbas hoin Ramallah-ah meeting an neih thu Nasser chuan a sawi a, president Abbas hnenah chuan an ram inthlanpui neih ni tur atana ṭha ber tur rawtna a thlen. Hei bakah hian inthlan hi an ram president-in a ni leh hun tur a tihchian hunah a inbuatsaihna atan hian ni 120 vel lai an mamawh dawn thu a sawi bawk. 

PCEC executive director Hisham Kuhail chuan President-in inthlan ni leh a hun tur a siam vat dawn thu sawiin, Ramallah-ah meeting an neih honaah president Abbas chuan January 20 hmaa inthlan neih hun tur tihchian a remtih thu a sawi.

Palestinian-ah hian legislative election neih hnuhnung ber chu kum 2006 January kha a ni a, kha inthlanah khan Hamas chuan hnehna an chang a ni. Kum 2005 January thlaa President thlanna neiha khan tuna President ni lai, kum 84 mi Abbas hi chief of the Palestinian Authority atan thlan a ni.