Covid-19 hri zirchiang turin China-ah zin thei dawn

World Health Organization (WHO)-in expert member 10 awmna team a din chu Covid-19 hri lo chhuah dan chanchin kimchang zirchiang tur leh, mihringa he hri lo darh chhoh dan zirchiang turin Ninganni (January 14) khian China-ah an zin thei dawn ta. 

Heng mithiam  rualte hi Chinese scientist-te nen an thawkho dawn a ni tih National Health Commission chuan a tarlang a, mahse chanchin kimchang erawh a tarlang lo. Kar liam ta khan China chuan an rama Covid-19 hri leng chungchang zir chiang tura kal turte hi an rama luh a lo phallo a,hei vang hian WHO director Dr Tedros Adhanom Ghebreyesus chuan a hrilhhai thu leh a lungnih loh thu pawh a lo sawi tawh a ni.

Nikum July thla khan WHO chuan Covid-19 hri lo chhuah dan chanchin kimchang zirchiang tur leh, mihringa he hri lo darh chhoh dan zirchiang turin international scientific team (expert)-te chu China ramah a tir dawn tih a puang a, an zir chian hun chhung tur hi thla ruk aia tam a ngai dawn niin a sawi.

Covid-19 hri hi kum 2019, December 12 khan Hubei province-a Wuhan khuaa ramsa zawrhna hmun, wet market aṭangah hmuh ṭan nia sawi a ni. Wet market hi China chauh ni lo, Asia ram dangah pawh hmun pawimawh tak niin, thlai thar, sa leh sanghate zawrhna hmun a ni a, hmun tam zawkah chuan ramsa hi zawrh tel a ni ngai lo. 

Mahse Covid-19 hri hi wet market aṭang hian a rawn in ṭan reng em tih chu hriat chian a ni lo a, sawi dan hrang hrangah chuan China siam ni hial sawite pawh a awm. Hengte avang hian he hri lo chhuah dan chanchin kimchang zirchiang turin WHO chuan expert-te chu China-ah tirh luh a tum phah ta a ni.

Covid-19 hri kai tawh zawng zawng hi khawvel pumah mi 9,07,43,423 an awm tawh a, heng zingah hian mi 6,48,92,318 chu enkawl dam tawh niin, he hri vang hian mi 19,44,311 an thi tawh.