UK-in hun khirh tak kan hmachhawn thei : UK chief medical officer

United Kingdom (UK) chief medical officer Chris Whitty chuan vaccine hnathawh a lan vat loh chuan an ramin hun khirh tak an hmachhawn theih thu a sawi. 

Chris Whitty chuan tun kar chho aṭang hian Covid-19 hri kai nasa takin an ramah hian a pung leh zual dawn niin a sawi a,  mipuite chu sorkar thu zawm a, midangte hmu tam lo turin leh a fimkhur thei ang bera awm turin a chah.

Sorkar chuan a rang lamin England-ah vaccine lakna centre a hawng a, tun kar hian he centre-ah hian mi 1000 chuangin vaccine an la dawn a ni. GP-led leh hospital service-te chu siam belh a nih dawn thu England-a National Health Service chuan a tarlang.

February thla laihawl hian mi maktaduai 15 vel chu vaccine pek hman tum a nih thu sorkar chuan a sawi a, heng zingah hian kum 70 chuang tawh te, healthcare worker-te leh mamawh zualte an tel. Pathianni khan UK-ah hian Covid-19 hri kai thar mi 54,940 an awm a, anni nen hian UK-a Covid-19 hri kai tawh zawng zawng hi mi 30,72,349 an awm tawh a ni.

UK-ah hian nikum December thla aṭang khan Covid-19 hri chi dang a len avangin kai thar hi an tam phah hle a, ramchhunga ambulance service-te pawh an indaih lo ṭan nia sawi a ni. Chief executive of College of Paramedics Tracy Nicholls chuan damloten ambulance hi darkar kua te an nghah a ngaih ṭhin thu a sawi. British health secretary Matt Hancock chuan sorkarin lockdown a puan leh inkaihhruaina a siamte chu zawm ṭha turin mipuite a chah a, mipuite chu pawnchhuak lo hram turin a chah bawk.