UN hotuin thawhho a pawimawh thu a sawi

UN Secretary-General Antonio Guterres chuan khawvela intluk lohna leh hleih neihna tihtlem a nih theih nan khawvel ram hrang hrangten thawhhona ṭha an neih theih a pawimawh thu a sawi.

Pathianni khan virtual-in UN hruaitute chuan meeting an nei a, he meeting hi UN General Assembly vawi 75 tlin puala meeting hmasa ber a ni. He hunah hian Secretary-General Antonio Guterres chuan UN sponsored global survey neihah  97% chuan thawhhona hmanga UN-in a hnathawhte a tihhlawhtlin thu an sawi a ni. 

Guterres chuan ram hrang hrangten thawhhona lam an ngaihtuah avangin lawmthu a sawi, mahse hei hi duh tawk mai loin hei aia hmasawnna a la awm theih thu a sawi bawk. "Vawiinah chuan khawvel kan inthlun zawm fur tawh a, tualchhung leh hmun kilkhawrte chu a theih ang anga biakpawh theih leh kalpawh theih an pawimawh hle a, hei hian an thil tum tihhlawhtlinna kawngah a pui thei a ni," tiin Guterres chuan a sawi bawk.

General Assembly hnathawh ber chu mitinten hriselna ṭha an neih theih nan te, ziak leh chhiar thiam an lo pun nan te, rethei lutuk bik awm loa retheite dinhmun chawikan te, human rights chawi nun sauh sauh leh mipa leh hmeichhia inthliarhranna bik awm loa an khawsak theihte a ni tiin,   Guterres chuan a sawi.

"Khawvel chuan kum tam tak chhung ram lian zawkte indo a hre tawh ngai lo a, hei hi kan thawhhona hlawhtlinna lian tak pakhat chu a ni. Kan hun liam tawh kum 10 chhung kha khawvela lum ber ṭum a ni a, khami hun chhung khan kan boruakah hian carbon dioxide san lai ber a thleng hial a ni. Tun hnaiah ram leh ram inkarah innghirnghona a thleng leh a, nuclear ralthuma kan intlansiakna pawh chawh thoin a awm leh niin a lang. Covid-19 hri leng vangin retheihna a zual a, chaw khawp kham lo an pun bakah intluk tlan lohna a zual phah a, hei vang hian ram hrang hrangte thawkho turin kan pawimawhin, heng kawngah hian chona nasa tak kan hmachhawn mek a ni," tiin Guterres chuan General Assembly-ah thu a sawi a ni.