Australia ram kang vangin mi 24 an thi tawh

Australia-ah chuan nikum November thlar tir aṭang khan kumdanga an tawh fo thin ang bawkin ram a kang leh a, mi 24 an thih tawh bakah, chenna in 2,000 chuang a chhe tawh.

Kar kal ta Inrinni khan Kangaroo Island-ah mi pahnih an thi thu tarlan a ni. Australia chhim lam chu a kang nasa hle a, 'Flinders Chase National Park' pawh nasa takin a kang. He hmunah hian Kangaroo 60,000 vel an awm bakah, Koala bear 50,000 vel an cheng ni. Australia chhim lam ram hectare 100,000-a zau chu a keng che tawh niin thuneitute chuan an sawi. Ram kang hi Australia prime minister Scott Morrison chuan pawi a tih thu sawi langin, thite hi a tawrhpui takzet thu leh hmun hrang hranga harsatna tawkte chu sipaite leh thuneitute'n an theih ang anga chhanchhuah hna an thawh mek thu a sawi bawk. 

Australia ram kang hian ziaawm lam a pan hlei thei loa, Victoria leh New South Wales (NSW) khuate chu ram kang tuar nasa an ni. Victoria leh NSW-ah hian mi 10 an thih tawh thu leh chenna in 500 chuang a kan chhiat tawh thu tarlan a ni. Victoria leh Mallacoota khuah hian ram kang vangin mi 1000 chuang hmun him lama thiar chhuah an ni tawh bawk.  Ram kang hi a nasat em avangin duh angin kang ṭhelhtute hian a ṭhelh hna hi an thawh chak theih loh bakah khawlumin zual lam a pan zel a ni. Kum 2013 January 7 khan khawlum zawng chu 40.3C a ni a, hei hi Australia ram khawlum ber ṭum a ni. Mahse nikum December 16 khan Australia-a khawlum zawng chu 40.9C (105.6F) niin, hei hi an ram khawlum ber record a nih thu Bureau of Meteorology (Bom) chuan a tarlang.