Israel-ah Hamas-in an thahte hriatrengna hun hmang

Palestinian firfiak pawl, Hamas ten October 7, 2023-a Israel chhim lam bei a, mi 1,200 an thah champha vawi hnihna chu nimin khan Israel ram hmun hrang hrangah Hamas in a beihnaa thite sunna leh hriatrengna hun an hmang.

Nimina hun hman hi mitthi chhungte huaihawt a ni a, Israel sorkar chuan Hebrai calendar angin hriatrengna hun hi kar lehah a buatsaih dawn thung.

Kum hnih liam ta, October 7, 2023 khan Hamas hian Israel chhim lam chu rocket hmanga an kah hnuah luhchilhin an bei thut a, army base bakah outdoor music festival neihna hmunte an bei tel a ni. Mi 1,200 vel an that a, a tam zawk hi civil mi niin hmeichhia leh naupang pawh eng emaw zat an tel. Mi 251 manin Gaza Strip-ah an hreng zui bawk a, an zinga a tam zawk hi chhuah an ni tawh a, mi 48 an la hreng mek. An mi hren zingah hian 20 vel chauh an la dam niin Israel chuan a ring a ni.

Hamas-ten an ram bei a, mi tam tak that a, mi eng emaw zat an man avangin Israel chuan Hamas rorelna, Gaza Strip-a Hamas hmunte a bei let ve nghal a, tun thlengin Gaza Strip-ah an inla indo chhunzawm ta reng a ni. Israel-Hamas indona thleng vang hian Hamas thlawptu, Iran leh a thurualpui ramte nen pawh Israel hi an indo phah bawk a ni.

Gaza Strip indona tihtawp a nih theihna atana inremna siam tura hmalakna hrang hrang awm mah se tun thlengin inremna an la siam thei lo. Hetih lai hian US president Donald Trump-a'n inkahhai puan a nih theihna tura ruahmanna a siam thar chungchangah Israel leh Hamas aiawhte chuan Thawhṭanni aṭang khan Egypt-ah inbiakna an nei ṭan. Israel leh Hamas aiawhte hi Egypt leh Qatar palaite kaltlangin an inbia a, inbiak thawh khatna chu boruak ṭha tak hnuaia neih niin, nimin khan a thawh hnihna an chhunzawm leh nghal a ni. Hamas mi hrente leh Israel jail hrang hranga Palestinian tangte chhuah a, inthleng tawn dan tur chungchang an sawi hmasa niin an tarlang.

President Trump chuan inremna an siam theih ngei a rin thu a sawi a, palai hna thawktute pawh Gaza indona tihtawp a nih thuai theihna tura inbiakna neih mek chu chak zawka kalpui turin a ti.