Iran-in nuclear talk chhunzawm tum lo

Iran foreign ministry chuan Europe ramten an ram hrekna an siam thar leh avangin nuclear programme chungchanga inremna siam tura inbiakna chu neih chhunzawm mai an tum lo tih a sawi.

Kum 2015-a Iran nena nuclear deal siamtu zinga ram pathum, E3 tia sawi Britain, France leh Germany chuan kumin September 28 khan Iran hrekna hi an siam thar leh a, hei vang hian Iran hi a lungawi lo hle. "Tun dinhmunah inbiakna neih leh tumna kan nei rih lo," tiin ministry thupuangtu Esmaeil Baqaei chuan a sawi a, E3-te hrekna siam thar lehin a nghawng turte an zirchiang mek tih a tarlang.

US leh Israel bakah khawthlang ram dangte chuan Iran hi nuclear ralthuam siam tumah puhin, hemi atan hian uranium chhekkhawl leh sawngbawlah an puh a ni. Mahse, Iran chuan an puhna hi phain, nuclear programme a kalpui chu ralthuam siamna tur ni loin, civil mite hman ṭangkai tura a muanawm zawnga a kalpui a nih thu a sawi. Uranium sawngbawl tur pawhin nuclear Non-Proliferation Treaty hnuaiah dikna a nei niin a sawi.