Bangladesh inthlanpuiah Tarique Rahman-a'n chuh a tum

Bangladesh politician thawm nei lian, kum 17 chhung ram pawna tlanchhe tawh, Tarique Rahman chuan 2026 February thlaa an ram inthlanpui neiha chuh turin an ramah a kir thuai dawn tih a sawi.

Kum 59 mi, Rahman hi prime minister hlui Khaleda Zia fapa a ni a, Bangladesh Nationalist Party (BNP) acting chairman a ni mek. Inthlanpuiah hian a chuh a nih chuan a langsar ber tur zingah ngaih a ni. Kum 2008 aṭangin London-ah a khawsa tawh a, politics-a inbeihna hmanga thubuai hrang hrang siamsak a nih hnuah an ram hi a chhuahsan a ni. Thubuai siamsak zingah kum 2004-a PM hlui Hasina rally grenade-a beihnaa inhnamhnawiha puhnaah dam chhung tang tura hrem a ni a, mahse, Rahman hian a inhnamhnawih loh thu a sawi thung.

Kum 2024 August thlaa zirlaite kaihhruaia nawrh huaihawtna kal zelah, prime minister aṭanga Sheikh Hasina paihthlak a nih hnuin Tarique Rahman hi a thubuai tam zawkah thiam chantir a ni. Hemi hnu hian inthlanpui neih tura chuh a tum thu hi a sawi a ni.

Rahman-a nu, PM hlui Zia hi kum 80 mi a ni tawh a, Hasina sorkar laiin man niin jail-ah dah a ni. Jail aṭangin chhuah ni tawh mah se a hriselna a ṭha tawk lo a, inthlanah hian a chuh ve dawn leh dawn loh sawichian a la ni lo.