Nobel Prize in Medicine dawng tur puang

Kumina Nobel Prize dawng tur chu Thawhṭanni khan puan ṭan a ni a, Physiology or Medicine-a chawimawina sang dawng turin Mary E Brunkow, Fred Ramsdell, leh Shimon Sakaguchi te thlan an ni.

Nobel Prize dawng tur zingah kumtinin Medicine dawng tur hi puan hmasak ber a ni ṭhin a, Physics, Chemistry, Literature, Peace leh Economics-a chawimawina dawng turte puan chhunzawm leh an ni ṭhin.

Nobel Prize in Medicine dawng tura thlan zingah Brunkow leh Ramsdell- te hi USA ami niin, Sakaguchi hi Japan ami a ni. Brunkow hi Institute for Systems Biology, Seattle, USA-ah thawkin, Ramsdell hi Sonoma Biotherapeutics, San Francisco, USA-ah a thawk a, Sakaguchi hi Osaka University, Japan-a thawk a ni. An pathum hian human immune system chungchanga an hnathawh avangin chawimawina hi hlan an ni dawn a ni.