Nepal PM hlui leh Home Minister hlui lakah FIR theh lut

Nepal rama thla hmasaa nawrh huaihawtu, Gen-Z group chuan prime minister hlui K.P. Sharma Oli leh home minister hlui Ramesh Lekhak te lakah FIR an theh lut. Nawrh huaihawtnaa mi eng emaw zat thihna thlenga mawhphurtuah an puh.

Kathmandu district police office-ah FIR hi theh luh a ni a, justice Gauri Bahadur Karki kaihhruai high-level judicial investigation commission-ah hlan chhawn a ni tawh bawk. Oli leh Lekhak an puhna chungchang chhui tur commission pawh din a ni tawh bawk a ni.

Gen Z huaihawta September 8 aṭanga nawrh huaihawtah khan police-te silai hmehpuah leh buaina chhuakah mi 79 an thi a ni. Nawrh huaihawt ṭanni khan security force-te chuan ṭhalai pungkhawmte chu an pawng kah niin an sawi. A tuk, September 9 khan tharum thawhna nasa tak thleng zuiin mi eng emaw zat an thih phah a, sorkar building pawimawhte hal a ni bawk.

Buaina chhuaka thi chhungte hian Oli leh a cabinet member-te lakah complaint an lo theh lut tawh bawk a, mahse, police-te chuan a hrana an chungchang an lo chhui chuan commission-in chhui hna a thawh an tihbuai an venthawn avangin thubuai hi an ziak lut mai lo niin an sawi. Mahse, commission hian pawikhawihna thlenga inhnamhnawihte laka action lakna tura an report chu nghah kher a ngai lo tiin a sawi a, hemi hnu hian FIR pawh hi ziah luh a ni ta a ni.