Japan PM-in Trump a ring tawk

Japan Prime Minister Shinzo Abe chuan US President-elect Donald Trump chu a ringtawk tih sawiin, thawhdunna ṭha tak an neih ngei a rin thu a sawi.

Shinzo Abe hian Ningani khan New York-a Trump Tower-ah Donald Trump hi a hmu a, minute 90 chhung an inkawm a ni. US President atana thlan tlin a nih hnu a, Trump-aín ramdang hruaitu a hmuh hmasak ber a ni.

US leh Japan hi Indopui II-na hnu lai aṭang khan an thawkdun ṭha hle a, Japan ram sum dinhmun siamṭhat tuma hma laknaah US chuan a pui nasa hle.

Trump chuan Japan chuan an rama US sipai awmte chu a ngaihsak zual a ngai nia a hriat thu a sawi a, hei baka han Japan leh South Korea ramte chuan North Korea missile do letna turin nuclear ralthuam an siam a ngai nia a hriat thu a sawi bawk.

Abe chuan Trump nen chuan inkawmna ṭha tak neiin thil tam tak an sawidun tih a sawi a, hun remchangah inhmuh leh an remtih thu a sawi. Mahse Trump-a nena an inkawmna kimchang erawh a tarlang lo.

US President atana thlan tlin a nih hnuah Trump hian ram hruaitu eng emaw zat chu telephone-in a be tawh a, mahse hmaichhana inhmuhpui erawh Abe chiah a la nei. Trump hian a cabinet turte a buaipui chho mek a, an party hruaitute pawh a kawm kual reng a ni. Ningani vek khan Secretary of State hlui Henry Kissinger leh South Carolina Governor Nikky Haley-te pawhin Trump hi an hmu a, Republican ex-presidential candidate Mitt Romney nen pawh an inhmu dawn.