Heroes Cemetery-ah Marco-a phum

Philippines rama kum 20 zet roreltu, Ferndinand Marcos-a ruang chu nimin khan an ram khawpui, Manila-a Heroesí Cemetery-ah phum ṭhat leh a ni.

Dictator hlui, Marcos-a hi kum 1986 khan a thuneihna aṭanga paihthlak niin ram pawn lamah himna zawngin a tlanchhia a, US-a Hawaii-ah cheng zuiin kum 1989 khan a thi. A rorel lai hian mi tam tak tihhlum leh nghaisak, rukbona thlengah puh a ni. A ruang hi an ram hruaitu hlui leh mi ropui leh sipaite an phumna, Heroes Cemetery-ah phum ṭha leh tura hun rei tak nawr a nih hnuah August thla khan President Rodrigo Duterte chuan a remti a, tun thla tir lam khan Surpeme Court chuan a ruang hi sawn a phalsak hnuah nimin khan phum ṭhat a ni leh ta a ni.

Heroes Cemetery-a Marcos-a ruang phum remtih a nih avang hian mi tam tak chuan November 11 khan Manila-ah lungawi lohna an lantir a, nimin pawh khan ram pum huapin lungawi lohna an lantir leh bawk. Mahse Court chuan mi tam takin Marcos chu mihring dikna chanvo palzutah puh mah se, legislator, defence secretary leh sipai hlui a nihna leh, Medal of Valor awardee a lo nih tawhna chu haider sak theih a ni lo, a ti.

Marcos leh a nupui Imelda-te hian kum 20 zet Philippines-ah ro an rel a, an rorel chhung hian mipuite chungah an che rawng hle nia puh an nih bakah, sorkar sum dollar tluklehdingawn tel an ru nia puh an ni bawk.