Khawvel Lawrkhawm
SKorea mipuiten Japan nena inremna siam duh lo
South Korea ram mipui hmun thuma ṭhena hmun hnih chuan Japan nena sipai thawhdunna tur thuthlung ziah tum chu an thlawp lo.
Tun thla tir lam aṭang khan ram pahnihte hian sipaite thawhdunna tur inremna ziak tur hian inbiakna an chhunzawm leh a ni. Inremna siam tum chungchanga Gallup Korea-in mipui ngaihdan a lakah, an ram mipui 59% chuan an thlawp lo tih an sawi. Mipui tam zawk chuan indo laia Korea mipuite chunga Japan sipaite chet dan rawng tak avanga Japan-in ngaihdam a dil loh avangin inzawmna neihpui an duh loh thu an sawi.
South Korea sorkar chuan karleh Thawhlehnia cabinet meeting-ah military intelligence pact hi an pawm hman beisei a ni a, hemi hnu hian inremna tifel tur hian President pawmpuina lak leh a ngai ang.
Eptu party lian pathum-te pawhin inremna siam tum hi an duh lo a, he thil hi kaltlangpui a nih chuan Defence Minister Han Min-koo chu bang tura phut an tum thu an sawi.
Mozambique-ah oil lorry puak vangin mi tam tak thi
Mozambique khawthlang lamah Ningani tlai khan oil phurtu motor lian puakin a kang zui a, mi 73 an thih bakah midang 100 chuangin hliam an tuar.
Official-te chuan lorry hian Beira aṭangin Malawi-a dah tur oil a phur niin an sawi a, Tete province-a khaw pakhatah mi ṭhenkhatin a petrol phurh lak an tum laiin truck hi a let a, a kang zui ta a ni. Thi zingah hian naupang pawh eng emaw zat an tel a, hliam tuarte hi Tete provincial hospital-ah hruai nghal an ni. Vanduaina thlenna hmunah hian thil awm dan enfiah turin nimin khan minister pathum tirh an ni.
Australia Bank hal vangin mi 20 in hliam tuar
Australia rama Melbourne-ah nimin khan mi pakhat chu Commonweath Bank chhungah a inhal a, mi 20 chuangin hliam an tuar. Hliam tuarte hi damdawi-inah kalpui nghal an ni.
Bank chhunga inhal hian hliam na tak a tuar a, damdawi-inah police-te venna hnuaiah enkawl a ni. A thiltih chhan hi hriatchian a la ni lo tih an sawi. Hliam tuar mi paruk-te chu an dinhmun a ṭha lo hle nia sawi a ni bawk. Commonwealth Bank hi Australia rama bank lian ber a ni.