Khawvel Lawrkahwm

Malaysia PM Razak ban phut

Malaysia Prime Minister Najib Razak chu sorkar investment fund eiruah puhin, mipuiten bang tura phutin kawng an zawh.

Prime Ministr Razak hi sorkar investment fund aṭangin dollar tluklehdingawn khat eiruah puh a ni. Inrinnni-a kawngzawhte hian thawmhnaw rawng eng (yellow) inbelin, sorkar dik duhtu ëBersihí tiin an invuah. Kawngzawhnaa thu sawitu zingah hian Prime Minister hlui, kum 91 mi Mahathir Mohamad pawh a tel. Mohamad-a hi PM atana Najib-a thlang chhuaktu a ni a, mahse tunah chuan Najib-a kaihhruai sorkar chu eiruknaa inhnamhnawih nasaah a puh tawh a ni.

China-in Kim Jong Un hming lem zawnna titawp

Chinese website-te chuan North Korea ram hruaitu, Kim Jong-Un chu internet lama hming lem, Kim Thau-a (Fatty Kim, Kim Fatty the Third) tia zawn ṭhinna chu titawpin, search engine Baidu leh microblogging platform Weibo-ahte a tilang duh tawh lo.

China ṭawngin Kim-a hming lem an vuahsak, ëJin San Pangí tih chu ṭhalai lamin an hmang uar hle. Mahse North Korea official-te chuan a hming lem an vuahsak hi Kim hian a hriatchhuah hlauthawngin, China hnenah hian social media lamah hming an phuahsak ang hi tihlan remti lo turin an ngen a, hemi hnu hian search engine lamah an tibo ta nia sawi a ni.

NASA hotu bantir duh

US-a military leh intelligence hruaitute chuan President Barack Obama chu National Security Agency hotu Admiral Michael Rogers ban turin an nawr. Hetih lai hian Roger hi President-elect Donald Trump-a kaihhruai sorkarh chanvo pawimawh tak pek tum nia sawi a ni.

House Intellingence Committee Chairman Devin Nunes chuan Defence Secretary Ash Carter leh Director of National Intelligence James Clapper-te chu an thil phut chungchang sawifiah turin a ngen nia sawi a ni bawk.

Trump hian a kaihhruai sorkarah Roger hi national intelligence director-ah dah a tum nia sawi a ni a, hei hi Senate-in a pawmpui chuan Roger hian intellingence agency 16 a enkawl dawn a ni.