Obama hnuaiah Democrats-in seat 1,000 hloh

US-a Democratic Party chuan Barack Obama president-na hnuaiah, kum riat chhungin state legislature-ah seat 1,000 dawn an hloh hman.

Republican Party in tun thlaa inthlanah seat 45 an hmuh belh leh avangin state legislature-ah seat 4,170 a nei pha tawh a, hei hi 56% a tling. Hetihlai hian Democrats lam chuan seat 3,129 a nei a, a seat neih zat hi 42% a ni.

Grand Old Party, Republican party hian Obama rorel chhungin hma an sawn nasa hle a, kum 2010 mid term election-ah khan seat 700 neih belhin, 2014 election-ah seat 300 dawn a neih belh leh. Nakkum aṭangin GOP hian US ramchhunga partisan legislative chamber 98 zinga 67 a thunun thei dawn a, state legislature 24-ah thuneihna pumhlum a chang bawk ang. Democrats lam chuan state panga - Hawaii, California, Oregon, Connecticut leh Rhode Island-a legislative chamber-ahte chauh thuneihna an chang pha a ni.