Dik lo tak thiltihnaah SKorea president a inhnamhnawih : Prosecutor

South Korean prosecutor-te chuan an ram president, Park Geun-hye-i chu a ṭhianṭha tak leh a thawhpui hluite dik lo taka thiltihnaah a inhnamhnawih ve niin an sawi a, thu zawhfiah thuai an tum.

An ram danah President ṭanglai hi man theih ni lo mah se, an chhui chiang dawn tih Seoul Central District Prosecutorsí Office chief prosecutor Lee Young-ryeol chuan a sawi.

News conference a neihah Lee chuan, finfiahna an neih aṭangin dan kalha thiltitu Choi Soon-sil, Ahn Jong-beom leh Jung Ho-sung te thiltihnaah president hi a inhnamhnawih ve ngei nia a lan thu a sawi. Choi-i hi President Park-i ṭhianṭha tak a ni a, an inzawmna hi hmang ṭangkaiin local firm-te chu a foundation enkawl tan sum tam tak a thawh tir a, hengte hi a mimal hlawk nan a hmang nia sawi a ni.

Kar kalta Inrinni zan khan President Park-i ban phut hian South Korea-ah kawngzawh huaihawt a ni leh a, mi nuai ruk vel an tel nia sawi a ni. Kawngzawh hi civil group 1,500 vel intelkhawm ten an huaihawt a ni a, Seoul bakah khawpui hrang hrangah huaihwt a ni bawk. Inrinni zana kawngzawh hi President ban phuta mipuiten nawrh an huaihawt ṭum li-na a ni.