SKorea eptuten President paihthla turin hma la dawn

South Korea eptute party, Peopleís Party chuan President Park Geun-hye-i paihthlakna tur, impeachment motion kalpui a nih theih nan signature campaign a nei dawn. Hethlai hian eptu party dang, Democratic Party pawhin President paihthlak a nih theih dan hi a ngaihtuah dawn niin a sawi.

Prosecutor-te chuan President Park-i hi a ṭhianṭha leh a thawhpui hluiten sorkar kaihhnawih thila dik lo taka thil an tihnaah a inhnamhnawih ve ngei niin Pathianni khan an lo sawi tawh bawk.

Park-i ṭhianṭha tak Choi Soon-sil-i leh a thawhpu hlui An Chong-bum te chu President nena an inṭhianṭhatna te dik lo taka hmang a, an foundation enkawlte tan company liante sum an thawh tir nia puh an ni. Hemi bakah Park-i hian sorkara nihna pawimawhna engmah nei lo, Choi-i hi sorkar policy siamna kawngah te a inrawlh tir a, President a nihna anga a thusawi tur pawh a siam tir nia puh a ni bawk. Heng thil thleng van ghian Park-i chuan an ram mipuite hmaah thupha a lo chawi tawh a ni.

Eptute chuan kar li chhungin Inrinni apiangin President Park-i hi bang tura phutin Seoul-ah kawngzawh an huaihawt tawh a ni. Mahse kum 2018, February thla a term tawp tur, Park-i hian bang tura an nawrna chu a pawm lo.

Parliament-a seat 38 neitu, Peopleís Party chuan Park-i ban a nih theih nan hian hma lain, party dangte pawh signatur campagin neih turah tel turin a sawm dawn tih a sawi. Impeachment motion hi parliament-ah pu lut tur chuan parliament member zahve talin an thlawp a ngai a, pass dawn chuan member hmun thuma ṭhena hmun hnihin an thlawp a ngai bawk. Impeachment motion hi pass a nih hnuah pawh Constitution Court in a ennawn leh ang a, judge pakua zinga paruk talin an pawm a ngai ang.