Party president candidate chuhnaah Sarkozy a chak lo

France President hlui Nicolas Sarkozy chuan an ram president thlanna neih tura centre-Right party candidate ni tura primary election neihnaah a chak zo lo.

Pathianni khan primary election round hmasa ber neih a ni a, Prime Minister hlui Francois Fillon chu a chak ber a, PM hlui bawk Alain Juppe chuan a dawt a, Sarkozy chu pathumna a ni pha chauh a ni. Vote hmu sang pahnihte hian Pathianni hian inthlan thawh hnihna an hmachhawn leh dawn a, a chak zawk chu nakkuma France President thlan turah Republican party candidate a ni ang. Kum 61 mi, Sarkozy chuan a chak loh a pawm thu sawiin, an ram tana ṭha ber a duh thu a sawi a, Fillon chu a thlawp tur thu a sawi nghal bawk. Primary election-ah hian Fillon chuan vote tla aṭangin 44.2% a hmu a, Juppe-an 28.5 leh Sarkozy-an 20.6% an hmu a ni. Inthlan thawh hnihna neih leh tura Fillon hi a chak leh ngei rin a ni.

Rorellai Socialist leh an thurualpui party chuan nakkum January thlaaah primary election hi an nei dawn chauh a, Socialist party hruaitu President Francois Hollande chuan inthlanah hian a chuh dawn leh dawn loh a la sawi chiang lo.