Khawvel Lawrkhawm

Turkey jet-in IS hmun 17 kap chhia

Turkey jet fighter chuan Pathian zan khan Syria hmarlama Al-Bab-a Islamic State (IS) hmun pawimawh 17 an kahchhiat sak.

Turkey hian Euphrates Shield operation a nei mek a, indo thlawhtheihna hamng hian Al-Bab biala IS ho luah in pahnih chu bomb 16 hmangin an tihchhiat sak a, IS target an kapchhe bawk. Hemi ni vek khan IS firfiakte hian Al-Bab khaw bula Turkey sipaite awmna hmn chu an bei ve bawk a, sipai pahnihin hliam an tuar.

Queen Elizabeth-i a in cheithat man chawi turin duh

Britain mipuite chuan an ram lalnu, Queen Elizabeth II chu Buckingham Palace chei ṭhatna tur, pound matrumktaduai 370 dawn chu ama sum aṭanga pe turin an duh.

Kar kalta Zirtawpni khan UK sorkar chuan lal in chei ṭhat a nih tur thu leh, hemi atan hian pound 369 vel sen a nih tur thu a sawi a, in chei hna hi nakkum April thla aṭanga thawh ṭan tum a nih thu a tarlang. He thu puanchhuah a nih hnu hian lal chhungkua chu lal in cheina man anmahnia tum tura phutna, online petiton siam a ni a, niin thleng khan mi 88,389 signature an lakhawm tawh. Queen Elizabeth II hausakna hi pound maktaduai 340 vela chhut a ni a, Sandrigam House leh Blamoral Castle a nei bawk.

Pakistan-in helpawl pahnih dan pawnah hnawl

Pakistan sorkar chuan Taliban leh al-Qaida firfiak pawl nena inzawmna neia puh, Jamaat ul-Ahrar leh Lashkar-i-Jhangvi Al-Alami (LeJ) chu dan pawnah a hnawl.

Heng pawl pahnihte hian kar kalta-a Balochistan-a Sufi shrine beihnaah inhnamhnawiha puh an ni a, he pawikhawihna thlengah hian mi 50 chuang an thi a ni. Pawl pahnihte dan pawna hnawla an nih thu hi National Counter Terrorism Authority website-ah tarlan a ni a, official chuan November 11 aṭang khan list-ah telh an ni tih a sawi. List-ah hian Jamaat-ud-Dawa chu enthlak mek tia tarlan a ni bawk a, pawikhawihna thlenga an pawl inhnamhnawih dan finfiahna ṭha a awm chuan dan pawna hnawl zingah telh theih a ni ang.