Khawvel Lawrkhawm

Myanmar atangin China-ah mi 3,000 tlanchhia

Myanmar ramri-a sipai leh helho inbeihna thleng avangin Myanmar aṭangin mi 3,000 chuang chu China ramah an tlanchhe tawh.

China ramri bulah hian Myanmar sipai leh helpawl pali-te an inkap a, ramriah inbeihna thleng vang hian China pawhin a sipaite chu inralring turin a hriattir tawh bawk. Inbeihna thleng avanga civil mi tlanchhiate hi China-a Yunnan province-ah an lut a, an zingah hian hliam tuarte pawh an awm. Myanmar-a Chinese embassy thupuangtu, Pan Xuesong chuan China thuneitute chuan an rama tlanlutte chu
ṭha taka an lo dawnsawn thu a sawi.

SKorea leh Japan-te’n sipaite thawhdunna ziak dawn

South Korea leh Japan chuan sipaite thawhdunna tur, military intelligence pact an ziak dawn.

Inremna siam tum hi South Korea mipui tam tak chuan an duh lo a, mahse nimin khan cabient meeting-ah pharh a ni a, vawiin hian South Korea Defence Minister Han Min-koo leh Japan ambassador Yasumasa Nagmine-te chuan Seoul-ah an ziakfel tawh dawn a ni. Inremna hi ziahfel a nih aṭangin hman ṭan nghal a ni ang. SKorea mipuite chuan Indopui II hunlaia an ram chunga Japan sipaite chetdan rawng tak avangin thawhdun hi an duh lo a ni.

Merkel-i’n inthlana chuh leh a tum

Germany Chancellor Angela Merkel-i chuan nakkum Chancellor thlanna neih turah a term li-na tura chuh leh a tum thu a sawi.

Merkel-i hi an party, Christian Democrats (CDU) hruaitute nena Berlin-a meeting an neihnaah Chancellor chuh leh a duh thu hi a lo sawi tawh a ni. Kum 11 zet Chancellor lo ni tawh, kum 62 mi, Merkel-i hian press conference a neihah amah pawh a inngaihtuah nasa hle tih a sawi a, nakkumainthlanna neih tur chu atan pawh thil harsa tak a nih tur thu sawiin, kawng hrang hranga sawiselna a tawh nasat hle a rin thu a sawi lawk nghal.