Japan-ah magnitude 6.9-a nain lir a nghing

Japan khawchhak lamah nimin zing khan magnitude 6.9-a nain lir a nghing a, lirnghing hian tsunami a thlen hlauhthawn thilah warning pawh tihchhuah nghal a ni.

US Geological Survey chuan a tirah lirnghing nat zawng hi magnitude 7.3 niin a sawi a, mahse a hnuah 6.9 a nih thu a sawi leh. Lirnghing inṭanna hi an ram khawpui, Tokyo aṭanga hmarlam km 67-a hla, Fukushima biala lei hnuai km 10-a thuk a nih thu a sawi bawk. Tokyo khawpuiah pawh lirnghing hi an hria. Lir nghin hun hi an ram sanaa zing dar dar 5.59 a ni a, thil tihchhiat lian tham a neih hriat a ni lo.

Lirnghing vang hian tuifawn na tak, metre thum thlenga sang a thleng thei nia sawiin Japan Meteorological Agency chuan warning a tichhuak a, tuipui kama chengte chu hmun sang lam pan tura hraittir an ni bawk.

Fukushima bial hian kum 2011 March thla khan lirnghing magnitude 9-a na leh tsunami in a nuai avangin chhiatna rapthlak an tuar tawh a, chhiatna thleng vanga thi leh chin hriat loha awm hi mi 18,000 chuang an tling a, nuclear reactor pathum a chhe bawk. Hemi ṭuma lirnghing hi Japan ramin lirnghing a tawrh nat ber a ni.

Japan ram hi lirnghing thlen duhna biala awm niin, lir a nghing ngun hle. Khawvel puma lirnghing, magnitude 6 leh a aia na thleng zinga 20% chu Japan rama thleng a ni.

New Zealand-ah pawh nimin khan magnitude 5.6-a nain lir a nghing. Lirnghing inṭanna hi an ram khawpui, Wellington hmarchhak km 200 vela hla, North Island-a lei hnuai km 10 vela thukah a ni. Lirnghing hian chhiatna a thlen hriat a ni lo. Kar kalta khan New Zealand-ah hian magnitude 7.8-a nain lir a lo nghing tawh bawk a, mi pahnih an thi.