Iraq sipaiten Mosul bulah khaw paruk an la

Iraq khawpui lian pahnihna, Mosul laklet tuma Islamic State (IS) laka beihpui thlak mek, Iraq sipaite chuan Mosul chhehvela thingtlang khaw paruk chu firfiakte kut aṭangin an la let tawh.

Iraq army, 9th armored Division-te chuan firfiakte nena nasa taka an inbeih hnuah, Mosul chhimchhak lama khaw pathum, al-Salamiyah, al-Hmeirah leh Twajnah al-Jadida-te chu an la let a, hmarlamah 16th Division leh an thurualpui Sunni paramilitary unit-te chuan al-Abbasiyah, Ortta-Kharab leh al-Salam khua te an la let tawh bawk.

Mosul khaw lak let tum hian Iraq sipaite hian thla khat chuang beihpui an thlak tawh a, Mosul khuaa cheng civil mi 65,000 dawn chu an tlanchhe tawh a, nitin an punbelh reng niin Iraq Ministry of Migration and Displaced chuan a tarlang. Kum 2014 June thla khan IS firfiakte hian Mosul khua hi Iraq sipaite kut aṭanga lain an awp zui a ni.