Myanmar-ah Malaysia Foreign Minister zin

Malaysia foreign minister Mohamad Hasan chu nimin khan Myanmar ramah a zin a, sipai thuneitute chu inthlanpui an neih tur chungchang a sawipui dawn bakah, an rama remna leh muanna a awm theihnan a hma la turin a nawr dawn tih Malaysia sorkar chuan a sawi.

South East Asia bloc, ASEAN-ah Malaysia hian hruaitu dinhmun a chelh lai a ni. A hma pawhin Myanmar tualchhung buaina tihtawp a nih theihna turin sipai sorkar hi a lo nawr fo tawh a ni. Tualchhung buaina tihtawp a nih theihna tura ASEAN-in point 5 awmna ruahmanna a siamte sipai sorkar hian a zawm loh avangin kum 2022 aṭang khan ASEAN meeting-ah Myanmar sipai hotute hi an tel an remti tawh lo a ni.

Mohamad Hassan hi ni khat chauh a cham dawn a, Naypyitaw-ah sipai hotu lu ber Min Aung Hlaing a hmuh bakah, prime minister leh foreign minister te pawh a kawm dawn bawk.

Myanmar ram inthlanpui hi kumin December 28 aṭanga neih ṭan tura ruahman a ni a, mahse, sipai sorkar dodaltu party ṭhenkhat chu inthlan chuh thei lo tura dan an nih bakah, chuh tum lo eng emaw zat an awm bawk. Hei vang hian inthlan hi party tlemte chauhin an chuh dawn a, sipaite hian an thuneihna chelh mek tihnghetna hmanrua atan inthlan hi hman tumah puhin sawiselna pawh a tam hle. Mohamad hian ASEAN chuan Myanmar rama inthlanpui buatsaih hmasak chu a ṭul hmasa bera a ngaih loh thu leh, remna leh muanna a awm theihna tura hma la phawt tura an duh thu July thla khan a lo sawi tawh a ni.