NKorea-in US kap pha tur ballistic missile pho lang

North Korea chuan an rama rorellai, Workers' Party kum 80 tlin lawmna pualin Zirtawpni liam ta zan khan an ram khawpui, Pyongyang-ah military parade a nei a, ralthuam a neih ṭhatte a pho lan zingah US ram laili kap pha tura ngaih, interncontinental ballistic missile, Hwasong-20 a tel.

Military parade hi an ram hotu lu ber, Kim Jong-un an a hmanpui a, ram dang hruaitu eng emaw zat pawh telin an zingah hian Russia Security Council deputy chairman, Dmitry Medvedes leh China premier Li Qiang bakah Vietnam hruaitu To Lam te pawh an tel.

Hwasong-20 hi nuclear strategic weapon system a neih chak ber tih NKorea chuan a sawi. Ralthuam pho lan zingah hian long-range strategic cruise missile, drone launch vehicle, leh ground-to-air bakah ground-to-ground missile te pawh an tel bawk a ni. Hwasong-20 hi ri kal chak lam aia a let nga chuanga chaka thlawk thei niin, kah chhuah a nih hnuah pawh a thlawhna lam tur thlak thei a ni a, hei vang hian defence system lam tan pawh lo dan a harsa dawn hle a ni. NKorea neih hi 11MA model nia sawi a ni a, solid fuel hmangin liquid-fuel rocket aiin a kahchhuah pawh a awlsam zawk nia sawi a ni. Kumin kumtir lam khan NKorea chuan Hwasong-20 a hman tur, carbon-fibre material aṭanga siam high-powered rocket engine chu hlawhtling taka a enchhin tawh thu a lo sawi tawh a ni.