Venezuela-in Norway-a embassy khar

Norwegian Nobel Committee-in Nobel Peace Prize 2025 dawng tura Venezuela politician, eptu pawl hruaitu, María Corina Machado thlan a nih thu a puan hnuah, Venezuela sorkar chuan Norway khawpui, Oslo-a an embassy chu an khar tih Thawhṭanni khan a puang zui ve nghal.

Venezuela sorkar chuan embassy a khar chhanah hian Machado chungchang erawh a sawi lang lo a; foreign service siamṭhatna kawng khat atan embassy hi khar a nih thu a sawi. Norway foreign minister pawhin Oslo-a Venezuela embassy chu khar a ni tih a nemnghet tawh a, Venezuela sorkar thiltih chu pawi an tih thu sawiin, Nobel Prize chu Norway sorkar nena inzawmna nei lo a ni tih a sawi.

Norway-a Nobel Committee chuan kar liam ta Zirtawpni khan khawvel chawimawina ngaihhlut, Nobel Peace Prize 2025 chu Venezuela mipuite democratic rights vawnhim a nih theihna atana a beihna avangin Machado hnenah hlan a ni dawn tih a puang a ni. Machado hi eptu pawl hruaitu niin, Venezuela sorkar leh president Nicolas Maduro sawiseltu a ni a, hei vang hian chawimawina hlan a ni tur pawh hi Venezuela sorkar chuan a pawmpui lo hle a, president Maduro chuan dawithiam sual tak tiin a sawi hial a ni.

Nobel Peace Prize hlanna inkhawm hi December 10-ah hian Oslo-ah hman a ni dawn a, Norwegian Nobel Committee chairperson, Jørgen Watne Frydnes chuan award hi a hlan ang.