Libya-a inbeihnaah naupang 14 an thi

Libya-a darkar 72 chhung zet thlawhtheihna hmanga inbeihna thleng­ah naupang 14 an thih bakah, mi 10 chuangin hliam an tawrh thu thu­nei­tute chuan an tarlang.

He inbeihna hi Libya khawpui Tripoli chhim lama awm Umm Al-Aranib-ah a ni a, kar kal ta Zirtawpni khan naupang 9 leh hmeichhe pahnih an thih bakah, Pathianni khan naupang 14 an thi leh nia tarlang a ni. Kum 2011-a Libya prime minister hlui Muam­mar Al Gathafi thah a nih hnu khan, Libya ramah hian buaina nasa zawk leh politics lama harsatna a thleng nasa leh zual a ni. 

An ram tualchhung buaina vangin Libya chhuahsan hian Medi­terranean tuipui kanin, Europe lam pana tlan­chhia an tam hle a, mi tam tak chu tuiah an tlahlum hial a ni. UNHCR chuan Libya tuipui kam chu lawng hmanga inthiarchhuah nan chuan a him lo hle tih an tarlang bawk. 

Libya-ah hian UN thlawp, Libya Prime Mi­nis­ter Fayez al-Serra kaihhruai Government of National Accord (GNA) leh Khalifa Haftar-a kaihhruai Libyan National Army (LNA)-te chu Libya ram pumpui lak tumin an inbei fo a, hei vang hian Libya ram hi a ralmuang lo hle a ni.