Iran inthlana candidate turte'n an hming thehlut ṭan

Nakkum February 21-a Iran legislative inthlanna neih tura in candidate turte chu Pathianni aṭang khan hming an thehlut ṭan. Candidate turte chuan an hming hi Iran khawpui Tehran-a Iran Interior Ministry-ah an thehlut ṭan a ni. December 7 thleng hming hi thehluh theih a ni a, nakkum May thlaah Parliament member thar thlanchhuahte chu lakluh an ni ang. 

Deputy Interior Minister Jamal Aref chuan inthlan neih turah hian candidate 7,000 vel an awm a rin thu a sawi. Kum 2016 inthlan khan can­didate 5,200 an awm. A tam zawk chu Reformists party an ni. Iran legislative assembly hi 'Islamic Consultative Assem­bly' tih a ni a, kum 2000 aṭang khan seat awm zat hi 272 aṭangin seat 290-ah tihsan a ni. Heng zinga seat 285  chu constituency 196 aṭangin mipuiin an thlang ang. Seat panga la awm erawh Zoroastrians, Jews, Assyrian and Chaldean Christians leh Armenians-te tana dah a ni thung. 

Nakkuma neih tur Iran legislative inthlan hi a vawi 11-na a ni dawn a, kum 4 danah inthlanna hi neih ṭhin a ni. Vote thlak thei hi kum 18 chin tih a ni a, vote nei mi vaibelchhe 5 chuang an awm a ni. Inthlannaa chak tur hian seat 146 hmuh phak a ngai a ni. Iran 'Islamic Consultative Assembly' inthlanah hian Conservatives leh Reformists party chu an inel ber ṭhin a, tunah hian Reformists party chuan parliament seat zaa 41 an la a ni. Conservatives party hian 20% seat an la ve bawk. A dang chu independent leh minority-te'n an la.  

Kum hnih liamta aṭang khan Iran hian an ram ei leh bar kawngah leh thil dang dangah harsatna a tawk chho neuh neuh a, hei hi a chhan pakhat chu US-in kawng hrang hranga Iran a hrek vang a ni. Sorkar lai Reformists party-te hian US an thawhpui thei vak lo niin a lang a, tunhnaia sorkarin petrol man a tihsan vang te, ram economy tlakchhiat avang tein lungawilohnate hmun hrang hrangah tihlan a ni. Hengte avang hian nakkum inthlanna neih turah hian, Reformists hian sorkar nawn theih lohna lian tham tak an nei ve thei tho bawk. 

1)     Iran khua leh tui diktak

2)     Master's degree a nei tur a ni

3)     Iran constitution tana rinawm tur a ni a, Islamic chu a thlawp tur a ni

4)     Muslim a ni tur a ni

5)     Hmingchhiatna a nei tur a ni lo

6)     Kum 30-75 inkar a ni tur a ni