Madagascar sipaiten an ram thuneihna chelh
Madagascar-ah Gen Z huaihawta hun eng emaw chen sorkar laka lungawi lohna lantir a nih hnuah, military elite unit CAPSAT hotu Col Michael Randrianirina chuan Thawhlehni khan president Andry Rajoelina paihthlak a nih thu leh, an ram thuneihna chu an kuta a awm tawh thu a sawi. Hetih lai hian Rajoelina chuan Thawhlehnia thuchah a tihchhuahah president a la ni reng niin a sawi thung.
Madagascar constitutional court chuan Col Randrianirina chu an ram hruaitu thar atan a puang a ni. Col Michael Randrianirina chuan kum hnih chhungin inthlan an buatsaih dawn tih a sawi nghal bawk.
CAPSAT, Personnel Administration and Technical and Administrative Services Corps, hi Madagascar-a military unit chak leh thiltithei ber a ni. Kum 2009-a Rajoelina-a'n thuneihna a chan theihna tur khan an pui a, mahse, tun ṭumah erawh a kaihhruai sorkar laka lungawi lohna lantirte lam an thlawp ta thung a ni. CAPSAT-in nawrh huaihawtte an thlawp hnu hian Rajoelina chuan a nunna a derthawng nia sawiin, himna zawngin ram pawn lamah a tlanchhe tawh a, a tlanchhiatna ram hi sawi lan a ni lo.