Bangladesh-a garment factory kangah mi 16 an thi

Bangladesh khawpui, Dhaka-a Mirpur area-a thawmhnaw siamna, garment factory-ah Thawhlehni chhun khan kangmei nasa tak a chhuak a, mi 16 an thi.

Factory building hi chhawng lia sang a ni a, Thawhlehni chhun laiah kangmei hi factory warehouse aṭangin a chhuak a, a bula thawmhnaw an siamna building chu a man kai nghal a ni. Kangmei chhuak hi darkar thum hnu velah an ṭhelh mit thei chauh a ni.

Fire service director Mohammad Tajul Islam Chowdhury chuan factory leh warehouse neitute hi police leh military officer-ten an zawng mek tih a sawi. Warehouse chu dan anga din a ni em tih pawh chhui chian a ni dawn bawk a ni.

Bangladesh-ah hian dan loa din factory a tam bakah, in saknaah mihring himna lam ngaihthah vangin chhiatna a lo thleng fo tawh a ni. Nikum chhung khan Bangladesh-a ṭum 26,500 chuang kangmei chhuak report a awm. Kum 2021 khan ei tur leh in tur lam siamna factory kangah mi 52 an thi a, hliam 20 an awm. Factory kang vanga chhiatna thlen nasat ber chu kum 2012-ah khan niin, thawmhnaw siamna factory kangah mi 111 an thi a, 200 chuang an hliam.