Isua mutna ranchaw pekna thleng thing them Bethlehem-ah thawn let
Isua Krista mutna, ran chaw pekna thleng thing them nia hriat chu kum 1,000 chuang hnuah Bethelehem-ah pek let a ni.
He thil hlui hlu tak (relic) hi kum zabi 7-na hunlai aṭang tawh khan Rome-ah dah a ni a, Pope Francis chuan Rome khawpuia an dahna hmun 'Basilica of Santa Maria Maggiore' aṭanga pe let tur hian thupek tichhuakin, thilpek angin Bethlehem hnenah hian pe let turin a ti.
He relic hi kutzungpui tiat let a ni a, Bethlehem panpui a nih hma hian Jerusalem-ah mipui hmuh theih turin pholan a ni phawt a, Bethlehem-ah hian Krismas erawh a hmang hman dawn ta a ni. Inrinni kha he relic hi Bethlehem thlenpui a ni tawh a, marching band nen lo lawmin St Catherine biak-in, Isua pianna hmun nia sawi Church of the Nativity bulah dah a ni.
Eng relic nge?
Kristian ṭhenkhat chuan he relic hi Isua Krista a piana an muttirna, ran chaw pekna thleng thing them kha niin an ring.
Holy Land-a Catholic custodian Custodia Terrae Sanctae chuan Patriarch of Jerusalem, St Sophronius chuan Pope Theodore I hnenah he relic hi kum zabi 7-na hunlaia a pek niin a sawi. Hemi hnu hian Rome-a Basilica of Santa Maria Maggiore-ah mipui hmuh theih tura pholan niin, nitin mi tam takin an en ṭhin.