Hamas-in Gaza-a civil mite beih an tum niin US-in sawi

US State Department chuan Gaza Strip-a Israel leh Hamas in inkahhai an puan mek karah, Hamas chuan Gaza-a civil mite beihna tur an ruahman nia report rintlak tak an dawn thu a sawi.

Inrinni khan hemi chungchangah hian thuchhuah siamin State Department chuan,"Palestinian civil mite beih an tumna chu inkahhai puanna atana inremna siam bawhchhiatna lian tak a nih bakah, Gaza Strip-a boruak muanawm a awm theihna tura hma lakna ngaih pawimawh lohna a ni ang," ati. Hamas chuan ruahmanna an siam anga civil mite an bei a nih vaih chuan, Gaza mipuite venghim tur leh inremna thuthlung vawnhim a nih theihna turin hma an la dawn tih an tarlang bawk. Eng ang takin nge hma an lak ang tih erawh an sawilang lo a, mahse, president Donald Trump chuan kar liam ta khan Hamas vauna hi a lo tichhuak tawh a ni. "Hamas ten Gaza-a civil mi an bei a nih chuan, thlan tur dang kan nei dawn lo. Kan lut ang a, kan that ve nghal ang," tiin a lo sawi tawh a ni.