Chhun engah Louvre museum rawk a ni

Khawvela museum tlawh hlawh ber, France khawpui Paris-ah Louvre museum chu Pathianni khan chhun engah rawk a ni. Museum rawktute hi nimin thleng khan man an la ni lo a, ngawrh taka zawn mek an ni.

Louvre hi khawvel huapa museum hmingthang niin, Mona Lisa lemziak awmna a ni. Rukruten an rawk hun hi an ram huna chawhma dar 9:30 leh 9:40 inkar a nih thu interior minister Laurent Nunez chuan a sawi. Mi pali nia hriat an nih thu leh, an lak tum ber chu Gallerie d'Apollon (Apollo's Gallery)-a an thil dah pahnih a ni, a ti. Basket lift hmangin gallery hi an lut a, tukverh chu disc cutter in an tichhia a, thil hlu an dahkhawm zinga pakua lain an tlanchhe zui nghal niin report chuan a tarlang.

An thil lak zinga mi, Napoleon-a nupui Empress Eugenie lallukhum chu musuem pawnah an thlauh a, an thlauhna lamah a chhe tel a ni. He crown cheinaah hian diomond 1,354 leh emerald 56 a tel tih museum website-ah tarlan a ni.

Louvre museum hi kum 1600 hma lam kha chuan France lalte awmna atan hman a ni ṭhin. Hallway leh gallery ropui tak tak a awm a, tlawhtu pawh a ngah theiin nikum khan min maktaduai kua in an tlawh.

Kuminah France ramah museum rawk a ni fo a, thla hmasa khan Paris-a Natural History Museum rawk a lo ni tawh a, gold sample USD 700,000 man hun an ru chhuak a ni. Thla hmasa vek khan Limoges-a museum rawk a ni bawk a, an thil ruk hlut zawng chu euro mtd 6.5 vel nia chhut a ni.