Kum 5 tang turin France President hlui Sarkozy jail-ah lut

France president hlui, Nicolas Sarkozy chu Libya ram hruaitu Muammar Gaddafi hnen aṭanga inthlanna campaign fund dawnna tura ruahmana puhnaah thiam loh chantir a nih hnuin, kum nga tang turin nimin khan Paris-a La Santé jail-ah dah luh a ni.

Sarkozy hi kum 2007-2012 khan France president a ni a, kum 2007-a president thlannaah khan a tlin theihna atan campaign-na atan Gaddafi hnen aṭangin sum tam tham tak dawnna tur ruahmannaa telah puh a ni. Gaddafi hi a hnuah Libya hruaitu a nihna aṭanga paihthlak niin thah a ni zui a ni. Sarkozy hi sum dawnna tura ruahmanna siam chungchangah thiam loh chantir ni mah se, a mimal tana sum dawng leh fund hmanga puhnaah erawh thiam chantir a ni thung. Sakozy chuan tihsual engmah a neih loh thu leh, an puhnate chu politics vanga an beihna niin a sawi.

Indopui II-na hnuah Sarkozy hi France president hlui zingah jail-a tang hmasa ber a ni. Nimin khan a chenna in aṭangin tang turin La Santé hi a pan a, a nupui Carlo Bruni chuan kalpuiin, amah thlawptu mi eng emaw zat an pungkhawm bawk.