Myanmar sipaiten cybercrime centre an dap, mi 2,000 chuang man

Myanmar sipaite chuan Thailand nena an inrina bula online scam kalpuina hmunpui dapin, mi 2,000 chuang an man bakah Starlink satellite internet terminal eng emaw zat an man tel bawk niin state media chuan a tarlang.

Ramria cybercrime centre-ahte hian ram dang aṭangin mi eng emaw zat bum lutin an thawh tir ṭhin nia sawi a ni. Danin a phal ang thlap hna thawh tur awm ang leh, hlawh pawh ṭha tak pe tur angin mi an bum lut a; mahse, dan khap thil thawh tirin an hreng lui zui ṭhin a ni.

US leh Britain in kar liam taa Cambodia cyberscam gang leh an hruaitu nia sawite hrekna a siam hnuah Maynmar ramria scam operation kalpui hian ngaihven a hlawh zual a ni. Myanmar-a Myanma Alinn chanchinbu chuan, sipaite hian September thla tir lam aṭanga ramria online scam leh gambling kalpui ṭhin dap chhuah hna a thawhnaah, cybercrime centre KK Park chu Thawhṭanni khan an dap tih a tarlang.

KK Park hi Thailand ramri bul, Kayin state-a sumdawnna hmun lian, Myawaddy khaw daia awm a ni. Ramri bial hi sipaite thunnunna hnuaiah a awm vek lo a, hmun ṭhenkhat chu hnambil helpawlte awmna hnuaiah an awm.

Sipai sorkar thupuangtu, Maj. Gen. Zaw Min Tun chuan KK Park-a dan phal loh thil kalpuinaah hian sipai sorkar dodaltu, Karen National Union hruaitute pawh an inhnamhnawih niin a sawi. Hetih lai hian Karen pawl chuan sipaite puhna hi an pha thung.