Mexico-ah tuilian vanga thi mi 76 an tling tawh

Mexico sorkar chuan an ram laili leh khawchhak lamah tun thla chhungin tuilian leh leimin avangin mi 76 an thi tawh tih a sawi a, chin hriat lohin mi 27 an la awm mek bawk.

President Claudia Sheinbaum chuan ruahsur nasa vanga chhiatna thlengin kawngpuite hnawha a tihchhiat tel avangin khaw 120 dawn chu tlawhpawh theih lohin an la awm tih nimina press conference a neihah a sawi. Harsatna tawkte ṭanpui hna chu ngawrh taka thawh chhunzawm reng a la nih thu a sawi a, chhiatna thleng tuartu chhungkaw 100,000 vel te chhawmdawlna turin USD mtd 544 ruahman a nih thu a tarlang. Tuilian leh leimin tuarte ṭanpui leh chhawmdawl hna hi sipai 12,700 ten an thawk mek a ni.

Mexico ramah May-October hi fur hun niin, ruah sur nasa tak a thleng fo. Mahse, tun thla chawlhkar hmasa berah khan kum dang zawng aia nasain ruah a sur a, hmun hrang hrangah chhiatna a thlen a ni. Veracruz, Hidalgo leh Puebla state-te chu a tuar nasa ber niin, tuilian leh chirh tawlhin chenna in 100,000 vel a len chhia a ni. Veracruz state bikah harsatna tawk hi mi nuai thum chuang an awm. Leiminin kawng a tihchhiat leh hnawh vanga tlawhpawh theih loha awmte hi helicopter hmangin ei turte thlak sak an ni. Kawng chhia siam hna thawhnaah private construction firm-te chuan sorkar an pui bawk.