Nepal PM-in party hruaitute inthlan neih tur chungchang sawipui

Nepal prime minister Sushila Karki chuan sorkar thar a siam hnua a vawi khatna atan Thawhlehni khan political party lian hruaitute a kawm a, an ram inthlanpui neih tur atana inbuatsaih dan tur leh security chungchang a sawipui.

Meeting hi Baluwawtar-a Prime Minister official residence-ah neih a ni a, political party hruaitu pawimawhte an tel a ni. PM chuan inthlanpui neih tur chu dik leh felfai taka buatsaih a nih theihna atan thawhpui turin party zawng zawngte a ngen.

Karki chuan a kaihhruai sorkar lailawk chuan dan ang takin hma a la zel dawn tih a sawi a, inthlanpui buatsaih a ni ang a, sorkar paihthlak taka eirukna thleng chhui hna pawh kalpui zel a ni, a ti.

Nepal Election Commission chuan an ram inthlanpui neih hun atan March 5, 2026 a lo ruat tawh a ni.

Gen Z kaihruaia nawrh huaihawt a nih hnuah Nepal-a prime minister Oli leh a kaihhruai sorkar chu paihthlak a ni a, inthlan buatsaih a nih hmaa sorkar lailawk kaihruai turin prime minister Sushila Karki hi ruat a ni zui ta a ni. Nawrh huaihawtna buatsaihtu, Gen Z hruaitute chuan political party thar dinin inthlan hi chuh an tum ve bawk. Election Commission-ah an party thar, Rastriya Gen Z Party Nepal tih hmingin register dilna pawh an theh lut tawh. Chairperson-ah Hira Prasad Seti ruat a ni a, central committee member 21 an awm bawk. Party office hi Anamnagar, Kathmandu-ah a awm a ni.