Syria din thar lehna atan USD tld 216 a ngai dawn

World Bank chuan hun rei tak chhung Syria rama tualchhung indona thleng vanga thil chhiate siamṭhat a, Syria ram din thar lehna turin USD tld 216 a ngai dawn niin a chhut. Hei hi 2024-a Syria gross domestic product let 10 dawna tam a tling pha.

Syria ramah hian kum 2011-a hetih laia president Bashar al-Assad kaihhruai sorkar laka lungawi lohna lantirte rawng taka beih let an nih avangin buaina nasa tak chhuakin tualchhung indona hi a thleng ṭan a ni. Buaina hi an ram hmun hrang hrangah darhin, infrastructure tam tak tihchhiat a ni a, an ram economy thlengin a tuar phah hle. Assad hi nikum December thla khan president a nihna aṭangin paihthlak a ni a, sorkar lailawk a din hnuah kumin March 29 khan president thar Ahmed al-Sharaa kaihhruai sorkar a ding a ni.

World Bank chuan infrastructure din thar lehna atan USD tld 82 vel a ngai dawn niin a chhut a, chenna in chhiate siamṭhat lehna atan USD tld 75 bakah non-residential structure siam ṭhatna atan USD tld 59 a ngai dawn niin a chhut. Inbeihna thlen nasatna, Aleppo leh Damascus te chu chei ṭhat ngai zual niin, investment tam zawk pawh mamawh a ni dawn tih a tarlang.

Assad-a president lai khan US leh Europe ramte chuan Syria ram hrekna hrang hrang an siam a, sorkar thar a din hnuah an hreknate hi an titawp hlawm a ni. Mahse, hreknate titawp a, khawthlang ramte nen an inkar boruak siamṭha a, Gulf ramten investment tam tham tak an tih hnuah pawh buaina an lo tawh rei tawh avangin an ram sum dinhmun hi a la ṭha lo hle.