NKorea-in ballistic missile enchhin

North Korea chuan nimin khan ballistic missile a enchhin a, an ram khawpui Pyongyang chhim lam aṭangin an ram hmarchhak lamah a kap chhuak niin South Korea Joint Chief of Staff chuan a tarlang.

NKorea hian ballistic missile an enchhin vawi khatna niin, nimina a kah chhuah hi short-range ballistic missile nia sawi a ni. Joint Chief chuan missile hi km 350 vela thui a thlawk nia sawiin, khawi hmunah nge a tlak tih a sawilang lo. He thil thleng vang hian South Korea national security council chuan meeting a ko nghal a ni.

South Korea hian kar lehah Asia-Pacific Economic Cooperation (APEC) summit a thleng dawn a; summit ṭan hma, tun kar chhungin US president Donald Trump bakah China president Xi Jinping-te chuan SKorea hi tlawhin SKorea president Lee Jae Myung te nen meeting an nei dawn a ni. Tun hma lamin SKorea-a hun pawimawh hman a nih laiin NKorea hian a ralthuam a lo enchhin fo a,APEC summit a thlen dawn vang leh, US president Donald Trump-a'n SKorea-a tlawh dawn vangin a chet leh ngei an rin thu expert-ten an sawi mek laiin, missile hi a lo enchhin leh ta a ni.

NKorea-in ballistic missile a enchhin hnuhnung ber chu May 8-ah khan a ni a, nimina a kahchhuah hi South Korea president, Lee Jae-myun-a'n office a luah hnua an enchhinna hmasa ber a ni bawk. President Lee hian NKorea nena an inkar siamṭhat a duh thu sawiin, hma a la mek a ni.