Japan PM tharin defence atana sum hman tihpun a tiam

Japan prime minister thar, Sanae Takaichi chuan nimin khan Parliament lower house-ah PM a nih hnua a hmasa ber atan thu a sawi a, sorkar policy hrang hrangte puangin, sorkar kum kal meka defence lam atana sum hman tur chu GDP aṭangin 2% a tihpun a tiam.

Takaichi chuan US, South Korea leh Japan, US, Australia leh India awmna Quad nena security lama an thawh hona pawh zau leh thuk zawka siam a tiam a, Japan rilru ang pu ramte nena thawh hona nghet leh chak zawk siam a tum thu a sawi bawk. Kum 2026 kum tawpah security strategy, defence strategy leh defence build-up programme pawh tihchangtlun a ni dawn tih a tarlang.

Chhungkaw sum la lut tlem, low-income te tan chhiah ngaihhnathiamna tur scheme siam a nih tur thu PM chuan a puang a, hei bakah petrol-a temporary tax lak chu tihtawp a ni dawn tih a sawi bawk. Essential worker - nurse leh mi dang enkawl ṭhinte hlawh tihsan a tiam a, social security insurance tihhniam a nih theih dan tur sawi ho a ni dawn tih a puang bawk.

Prime Minister chuan US nen inlaichinna ṭha zawk a siam dawn tih a sawi a, kar leha US president Donald Trump-a'n an ram a tlawh huna inbiakna an neihah pawh inrintawnna ṭha tak an siam dawn tih a sawi. Hemi rual hian an ṭhenawm, China, North Korea leh Russia sipaite chetdan chu ngaihmawhawm leh ngaihven ngai a ni tih a sawi.