Brazil President-in inthlan chuh leh a tum

Brazil president Luiz Inacio Lula da Silva chuan nakkuma an ram president thlanna neih turah chuh leh a tum tih a puang. Thlan tlin a nih chuan a zawn loin President term li a chelh thei dawn a ni.

Ningania Indonesia a tlawhnaa Indonesia president Prabowo Subianto nena joint news conference an neihnaah president Lula chuan inthlan chuh leh a tum thu sawiin, "Kum 80 ka ni tawh a, mahse, kum 30 mi ka nih lai ang tho khan ka tha a la tho ṭha reng a ni. Hei vang hian a term lina turin Brazil President thlannaah ka chuh leh dawn," tiin a puang.

Brazil ram danpui chuan an ram President dinhmun hi a zawnin term hnih chin chauh chelh a phalsak a ni. Lula hi kum 2003-2020 chhung khan a zawnin term hnih a lo chelh tawh a, kum 13 chhung thuneihna a chelh loh hnuah kum 2023 inthlanah khan president atan thlan tlin niin a president term thumna a chelh mek.

Kum 2026 inthlan neih tura mipui ngaihdan lak hrang hrangah Lula hian hma ala hruai zel a ni. A khingpui ber, president hlui Jair Bolsonaro chu September thla khan sipai chakna hmanga sorkar paihthlak tuma puhnaah thiam loh chantirin kum 27 tang tura hrem a ni a, house arrest-a hren a ni a, inthlan a chuh khapsak a ni bawk. Hei vang hian Lulu khing thei tur langsar dang an la awm lo a, president term lina chelh thei turin a dinhmun a la ṭha rih viau a ni.