Trump-a'n Thailand leh Cambodia inremna ziahnaah telpui

Thailand leh Cambodia ram hruaitute chuan nimin khan Kuala Lumpur, Malaysia-ah inkahhai puanna inremna an ziak a, US president Donald Trump-a'n a telpui.

Kumin July thla khan ram pahnihte hi ramri bul ram inchuh avangin ni nga chhung an lo inkap tawh a, Donald Trump a inrawlh hnuah inkahhai an puang a ni. Ramria an inbeihnaah hian civil mi eng emaw zat an thih bakah, ram pahniha ramri hrula cheng mi tam tak an tlanchhiat phah bawk. Nimina inremna an ziahah hian Thailand prime minister Anutin Charnvirakul leh Cambodia prime minister Hun Manet ten an hming an ziak a ni.

President Trump hi Kuala Lumpur-ah hian Association of Southeast Asian Nations (ASEAN) summit vawi 47-na hmang turin a kal a, Kuala Lumpur a thlen hnu lawkah a telpuina hnuaiah Thailand leh Cambodia hian inremna hi an ziak a ni. Inremna ziah a nih hnuah, Cambodia president Hun chuan Trump chu fakin, a kaihhruai sorkar chuan Nobel Peace Prize atan pawha a nominate thu a sawi lang.

Trump hian South Korea leh Japan pawh a tlawh dawn a, vawiinah Japan a pan ang a, Japan prime minsiter thar Sanae Takaichi nen an inhmu ang. October 29-ah South Korea-ah kalin Gyeongju-a Asia Pacific Economic Forum (Apec) leaders' summit a hmanpui dawn. Summit kar lakah hian China president Xi Jinping nen pawh an inhmu dawn a ni.