Egypt court-in Morsi hremna a sût

Egypt-a court sang ber, Court of Cassation chuan an ram president hlui, Mohammed Morsi-a damchhung tang tura hremna pek chu a s˚t sak.

Morsi hi mipui vote hmanga Egypt President atana thlan hmasak ber niin, kum 2012 kha thlan tlin a ni. Mahse kum khat hnuah a rorel danah mipuite an lungawi lo a, sipai chakna hmangin a thuneihna aṭangin paihthlak a ni. President aṭanga paihthlak a nih hnu hian man a ni a, thubuai eng emaw zat siamsak a ni zui bawk.

Egypt rama pawikhawihna thlentir tuma ramdang pawl ṭhenkhat nena inthurualah puhin kum 65 mi, Morsi hi damchhung tang tura hrem a ni a, hei bakah hian kum 2011-a an rama nawrh huaihawt lai a, tan in aṭanga mi tam tak tlanchhuahnaa inhnamhnawiha puhna thubuaiah thi tura hremna pek a ni bawk. Mahse thi tura hremna pawh hi kar hmasa khan court chuan a s˚t sak tawh bawk a ni.

President aṭanga paihthlak a nih hnuah sipai kaihhruai sorkar chuan Morsi-a party, Muslim Bortherhood chu firfiak pawlah puangin dan pawnah a hnawl a, an party member hruaitute dapchhuah hna an thawk zui a ni. Sipaite leh Muslim Brotherhood thlawptute inkara buaina chhuak vangin mi sang tel an thi a, mi tam tak jail-ah tantir an ni bawk.

June thla khan Morsi hi an ram thuruk pawimawhte Qatar hnena pe ruah puh a nih vangin kum 40 tang turin hrem a ni a, hei bakah hian kum 2012-a Brotherhood member-te mipui nawrh huaihawtte chunga rawng taka an chetnaa mawhphurtuah puhin, kum 20 tang tura hrem a ni tawh bawk. Hetihlai hian Morsi-a thlawptute chuan ro rel sak a nih dan hi a dik tawk lo tih sawiin, sorkar paihthlatute chuan an thil tih dik loh thupna atan hengte hi an hmang mai niin an sawi. Morsi-a thiam loh an chantirnate chu finfiahna rintlak awm lo niin an sawi bawk.