Khawvel

Hollande-a’n Dec 10-ah thutlukna puang dawn

France President Francois Hollande chuan nakkuma an ram President thlannaah a chuh dawn leh dawn loh chu Decmeber 10-ah a puang dawn.

Tihdan phungah chuan President ṭang lai hian inthlan chuh nawn leh a tum a nih chuan, midang nena inchuh loin an party candidate a ni thei nghal dawn a ni. Mahse tunhnaiah an ram mipuite lakah Hollande dinhmun hi a tlakhniam nasat avangin Socialist party chuan an party candidate tur thlanna, primary election an buatsaih mai thei nia sawi a ni.

France mipuite ngaihdan lakah, Hollande hian President inthlan hi a chuh leh a nih chuan inthlan thawh khatnaah a tlak nghal ringtu an tam zawk a ni.

China-a power plant chimah mi 40 an thi

China ram khawchhak lam, Jiangxi province-a Fencheng khuaa power station sak lai chu nimin zing khan a chim a, mi 40 an thi.

Power plant chim lai hian hnathawktu mi 68 an awm a, an zinga ṭhenkhat chu in chim hnuaiah hian an la tang a ni. Chhanchhuah hna thawk turin fire service truck 32 leh sipai 212 tirh nghal an ni. In chim hi 1,000 megawatt coal-fired power unit-a hman tur, cooling tower tura sak lai, meter 168-a sang a ni. He project thawhna atan hian dollar tluklehdingawn 1.11 ruahman a ni.

Malabo-ah Africa-Arab World Summit hmang

4th Africa-Arab World Summit chu Equotirial Guinea khawpui, Malabo-ah Nilaini aṭang khan ṭan a ni a, ram hruaitu 60 chuang an tel.

Summit thupui atan hian, ìTogether for sustainable development and economic cooperationî tih hman a ni a, Africa leh Arab ramten harsatna hrang hrang an tawhte hmachhawn tura thawhhona ṭha neih dante an sawiho. Africa-Arab Summit hi Africa-Arab Partnership hnuaia an hmalakna tur kalphung siamtu a ni. Summit hmasa ber hi kum 1977 khan Cairo, Egypt-ah neih ani a, kum 2010 aṭang khan kum thum danah neih a ni.