Trump-a’n a cabinet member tur hmeichhe 2 ruat

US President-elect Donald Trump chuan a cabinet member turin hmeichhe pahnih a ruat.

South Carolina Governor Nikki Haley-i chu UN-a US palai atan a ruat a, Betsy DeVos chu educatio secretary atan a ruat bawk. Hmeichhe pahnihte hian a hmain Donald Trump hi an lo sawisel tawh a, Haley-i chuan Trump chu a ngaihsan zawng a nih loh thu a sawi a, DeVos chuan midang thiltiha inrawlh ching tiin a sawi tawh bawk.

Cabinet member atana hmeichhe pahnih≠te a ruat thu a puan hnuah Trump chuan, primary election-a a khingpui zinga mi Ben Carson pawh chanvo pawimawh tak chelh tir tur a ngaihtuah mek tih a sawi.

UN-a US ambassador tura Trump-aín a ruat, kum 44 mi Nikki Haley-i hi a nu leh pa chu Indian an ni a, Sikh chhungkuaaah a seilian a, mahse tunah chuan Kristian a ni tawh. Party president candidate tur inchuh lai hian Florida Senator Marco Rubio a thlawp a, a hnuah Texas Senator Ted Cruz a thlawp leh a ni. Haley hian Trump-aín US-a Muslim luh khapna siam a rawt chu na takin a lo sawisel tawh a, a thil tum chu America kalphung a ni lo tiin a sawi. Haley hi Indian-American zinga cabinet rank official ni thei hmasa ber a ni ang.

Education Secretary atana ruat, Michigan-a Republican donor Betsy DeVos pawh hian Trump chu Repubican Party aiawhtu tling zo lo leh, an party-a rawn inrawlh ve ringawt niin a lo sawi tawh. Party candidate an chuh lai khan DeVos-i hian Trump-a khingpui, Carly Fiorina, Marco Rubio leh Jeb Bush-te tan sum pawh a thawh a ni. DeVos-i hi mi hausa tawntawn, billionaire a ni a, a pasal chu Amway rochungtu niin, a company hlutna hi Forbes chuan dollar tluklehdingawn 5.1 hu a tling niin a tarlang.

Donald Trump hian a team member atan hian Attorney General-ah Jess Sesssions, CIA director-ah Mike Pompeo leh Chief of Staff-ah Reince Priebus-te a lo ruat tawh a, tunkar chhung hian a member turte hi a puan belh rin a ni bawk. Trump-aín cabinet atana a ruatte hi Senate-in a pawmpui ve leh an ngai dawn a ni.