Afghanistan leh Pakistan-in inbiakna chhunzawm

Afghanistan leh Pakistan official-te chu inremna siam dan ngaihtuahin nimin khan Instanbul-ah a ni thumna atan an inbe leh.

Ram pahnih sipaite hi tun thla tir lamah ni eng emaw zat an inbeih hnuin, October 19 khan Doha-a an inbiaknaah inkahhai puan an remti a ni. An buainate chinfel a, inremna daih rei zawk siam dan ngaihtuahin inbiakna hi an nei chhunzawm leh a ni.

Afghanistan-a rorellai, Taliban sorkar thupuangtu Zabihullah Mujahid chuan ram pahnihte hian tharum tel loin, inbiakna hmanga an buaina neihte an chinfel theih an beisei thu a sawi. Hetih lai hian Pakistan lam chuan inbiakna neihah hian Taliban lam hian an thawhpui ṭha lo niin a sawi ve thung. Pakistan defence minister chuan Afghanistan chuan remna leh muanna a awm duh mah se, Istanbul-a inbiakna neihah inremna an siam theih loh chuan indona a thleng mai dawn niin a sawi.

US president Donald Trump chuan ram pahnihte buaina chinfelna tura puih a inhuam thu Pathianni khan a sawi. "Ka hrechiang dun ve ve a, an buaina hi rang takin ka chingfel thei ang," a ti.

Pakistan-in Afghanistan khawpui, Kabul-a Pakistani Talibani hotu beia airstrike a neih avangin ram pahnih inkarah buaina hi a chhuak a ni. Taliban chuan an ram khawpui beihna hi chhang letin, ramria Pakistan military post-te an kap zui ve bawk. Pakistan hian Taliban sorkar chu Afghanistan ram chhunga Pakistani Taliban-te inkhuar remtih sak leh, an ram aṭanga Pakistan security force-te an beih phalsakah a puh. Mahse, Taliban sorkar chuan an puhna hi a pha thung.