Israel-ah ram kang vangin mi 80,000 sawnchhuak

Israel rama khawpui lian pathumna, Haifa khuaa cheng mi 80,000 vel chu ram kangin khawpui dai a tuam tel avangin hmun him lamah sawnchhuah an ni.

Ram kang vang hian Jerusalem leh West Bank-a hmun ṭhenkhat pawh a him tawk tawh lo nia sawi a ni.

Thla hnih chhung ruahtui tlak ṭhat loh avangin khua a ro a, thli a tleh tel bawk avangin ramkang hi a darh chak hle a ni.

Israel police hotu Roni Alsheich chuan ram kang ṭhenkhat chu hal luih nia hriat a nih thu a sawi a, Prime Minister Benjamin Netanyahu chuan pawikhawihtute thiltih dan chu firfiaka chetna ang tluk a ni tih sawiin, an phu ang hremna pek ngei an nih tur thu a sawi.

Education Minister, Jewish Home Party hruaitu Naftali Bennett pawhin kangmei chhuakah hian Arab leh Palestinian mite an inrawlh a rin thu a Twitter-ah a tarlang a, hei hi Palestinian President Mahmoud Abbas-a pawl, Fatah chuan na taka sawisel≠in, Israel official-te chuan Palestinian te mawhpuh tumin ram hi an hal zawk niin an sawi.

Ramkang hian Haifi khawpui dai a tuam tel bakah, khawpui chhung chu meikhuin a bawh nasa hle. Mei khu hip luh nasat avanga harsatna tawk mi 130 chuang chu damdawi-inah enkawl an ni. Khawpui chhung hmun ṭhenkhat chu electric supply nei loin an awm bawk.

City council chuan kang≠mei chhuak hian in
ṭhenkhat a kanchhiat hnuah, mi 80,000 vel chu khawpui chhuahsan turin a hriattir. Kangṭhelhtuten theihtawp chhuahin an ṭhelh mek a, Ningani khan Haifa leh Tel Aviv inkar kawngpui pawh khar a ni.