Afghanistan-in opium thar hnem dawn

Afghanistan ramin kumin chhunga opium a thar chhuah tur chu kum hmasa lam aiin 43% zetin a tam dawn a, ton 4,800 an thar thei dawn niin Afghan Ministry of Counter Narcotics and the United Nations Office on Drugs and Crime (UNODC) chuan Aghanistan Opium Survey a tihchhuahah a tarlang.

Survey-a tarlan danin, Afghanistan ramah hian kum 2015 khan ram hectar 183,000-a zauah opium chin a nih laiin, kuminah chuan hectare 201,000-a zauah chin a ni. Nikum khan opium hi ton 3,300 an tharchhuak a ni.

UNODC executive director Yury Fedotov chuan, ruihhlo doa hma lak mek a nih laia hetiang result hriat a ni chu a lungngaih thlak hle a ni tiin, khawvel huap pawl hrang hrangte chu Afghanistan hmasawnna tura an hmalaknate thlawp turin a ngen.

Afghanistan-a poppy chingtute hi Taliban firfiakten chhiah an chawi tir ṭhin a, an sum hmuhte hi an pawl inenkawlna atan an hmang ṭhin. Khawvel puma opium chin zinga 80% hi Afghanistan rama chin a ni a, an ramah hian opium ngawlvei pawh an tam hle.