Colombia leh FARC helten inremna ziak ṭha leh

Colombia sorkar leh FARC helpawl chuan inremna thu≠thlung an ziak ṭha leh. Thla hnih liamta khan inremna an ziak tawh a, mahse an inremna thu≠thlungte chu Colombia mipui tam zawkin an pawmpui loh avangin, inremna hi siamṭhain an ziak ṭha leh ta a ni.

Ningani khan Bogota-a Colon Theater-ah President Juan Manuel Santos leh FARC hruaitu Rodrigo Londono-teín an ziak a, an inremna thuthlung siam hi phek 310 zeta chhah a ni.

President Santos chuan inremna an ziah hmasak hnawl a nih hnua a aia ṭha zawk siam tura dawhthei taka sorkar leh helpawl aiawhte hmalakna chu fakawm a tih thu a sawi a, inremna an ziah tak chu an ram mipuite pawhin an pawmpui ngei a beisei thu a sawi.

FARC hotu Londono pawhin Colombo rama ralthuam hman chu tharum thawhna lam ni loin, ṭawngkama inbiakna chauh a ni tawh dawn a ni, a ti. Inremna an ziah lai hian Theater-ah mipui tam tak an pungkhawm a ni.

Inremna thuthlung siamṭhatah hian a hmaa an lo ziah tawh aṭangin 50 zet thlak danglam a ni. Heng zingah hian FARC leh sorkar chungthu foreign magistrate-te rel tir khapna te, helin ruihhlo tawlhrukna
aṭanga an thil neihte chhawm zui lo a, an kut tuartu chhungte ṭanpuina atan pek tura tihna te a tel. Mahse eptu pawlin an phut lian ber, helpawl hruaitute jail-a tantir leh, politics an luhchilh dawn pawha khuahkhirhna chin siamsak erawh chu helpawl lam hian a pawm thei lo.

Inremna thuthlung an ziahṭhatah hian mipuite ngaihdan lak a ni tawh dawn lo a, President Santos hian Congress-ah a pharh dawn a ni. Congress-ah hian rorellai party hian majority a neih avangin a tlang ngei rin a ni bawk.