Khawvel

Central America-ah magnitude 7.0-a nain lir a nghing

Central America-ah Ningani kha magnitude 7.0 a nain lir a nghing a, lirghing hian thil tihchhiah lian tham a neih hriat a ni lo.

US Geological Survey chuan lir nghin ṭanna hi El Savador tuipui kam aṭanga km 120 vela hla, km 33-a thuk a nih thu a sawi a, El Savador leh Nicaragua ram bakah, Costa Rica khawpui San Jose-ah pawh lirnghing hi an hria a ni. Lir nghin hnu hian El Savador thuneitute chuan tsunami warning an tichhuak a, mahse a hnuah sut leh nghal a ni. Kar hnih kalta chhung lirnghing, magnitude 7.0 chuanga nain Japan leh New Zealand-ah lir a lo nghing tawh bawk.

Thailand parliament-in special session nei dawn

Thailand Parliament chuan kar leh hian special session a nei dawn niin National Legislative Assembly hotu chuan a sawi a, he hunah hian Crown Prince Maha Vajiralongkorn chu lal ṭhuthleng luah tura sawm chungchang an ngaihtuah rin a ni.

October 13-a Thailand lal, King Bhuminol Adulyadej a thih hnu khan a hmunruak hi hnawhkhah lohin a la awm a, a aiawhtu tur Crown Prince chuan an ram mipuite hnenah hun pe rih turin a lo ngen tawh a ni. Hei vang hian lal aiawh lailawk tur hian kum 96 mi, Prem Tinsulanonda chu ruat rih a ni.

Stalin-a hnuaia secret police-te hming pholang

Russian human rights group chuan Soviet Union dictator Joesph Stalin-a hnuaia secret police hna thawktu mi 40,000 vel hming an pho lang.

Stalin-a security force (NKVD) record hi Memorial website-ah a vawikhatna atan pho lan a ni. NKVD-te hi kum 1935-1939, The Great Terror tih hunlaia mi 700,000 zet suattute an ni. Stalin-a rorel lai hian mi nuai tel chu man leh thah an ni a, mahse hemi chungchang hi kum 1953-a Stalin a thih hnu thleng pawh khan Soviet Union chuan a zep tlat a ni.